聖誕節怪事 -- 大病一場

好怪....
這件事...應該由邊到講起呢...

大槪係四、五天前，
公司相繼有一、兩個同事病倒，
不過大家都唔係好相信佢哋病咗，
只係請咗一天假，隔日就可以精神奕奕咁返工！

就喺今個星期四，怪事就發生！
我買咗兩盒家庭裝雪糕返屋企，
就在我享受完果個「豆腐芝麻雪糕」，
喉嚨開始有些唔妥，當下都仍然唔覺得問題的嚴重性...
一切都由這裡開始...

星期五放工時，開始有少少頭痛，
返到家中，縱然可以勉強頂得到，不過失眠的情況又再次突襲，
只係瞓咗兩個鐘頭到，就衝衝起床返工...
不過情況...卻開始嚴重起來....
鼻水流過不停...

奇事就在這個時候出現，
Canteen老板娘提議的一杯「熱檸樂加薑」 ，
喝完後再加上少些的休息，鼻水確實已經收晒，神奇呀！
我為那一杯「熱檸樂加薑」驚嘆不已！
不過，事情的發展卻峰迴路轉，
一個鐘頭後，鼻水...又再次湧現，
回到家中整包紙巾已殲滅咗，
腦中卻不斷回想那杯「熱檸樂加薑」....

與家人食完冬至飯後，情況更加一落千丈，
可能係食咗海旁那些西北風影響...
今朝早起床時，發覺自己病情進一步嚴重，
更加咳到失聲...

看來聖誕佳節應該會與病魔同行，
過一個不會孤獨的聖誕節！
「病魔，來呀，飲勝呀！」

怪事就喺呢度完結。

當神探遇上舊同學

《神探》，杜sir與韋家輝的又一力作，
「每個人心裡都有隻鬼」簡單直接命中主題，
與人相處多少都總會學曉飾演帶面具的鬼。
戲中的鬼，說穿了其實只是為了遮閉傷口、保護自己的心魔，
實質化了潛意識所產生的人性陰暗面，
林家棟為殺警所產生的七隻鬼、
劉青雲為逃避所產生的妻子(鬼)、
安志杰為掩飾所產生的女鬼！

每個人都有...

我心裡那隻鬼，可能就是那隻"安逸"鬼，
這幾年打工的時間，確實像浪費了，甚麼也像沒有得著，
錢賺得不多、又學不到東西，
應該係時候...了.....
----------------------------

今日看完戲後，約咗啲舊中學同學BBQ聚舊，
不經不覺，就已經十年冇見了，二十多過呂記，好熱鬧！
大家樣貌都冇大咩大改變，
只係有人已經成家立室，帶著兒女聚舊，
突然覺得自己已經老邁滄桑了。

不過，身體仍然那麼熬不住，
BBQ後，回家的途中已經熟睡了！
八個鐘就是我外出的活動時間...哎

《東京鐵塔 我的母親父親》

(成篇blog唔見咗，真係唔想打過篇...哎....)

Gulugulu...人生就像這樣團團轉，離開了又回來！
努力經營過前半生，才彷然發覺為後半生留下了回憶，
當人們認為自己有所能力時，其實事情已經冇能為力！

《東京鐵塔》就是淡然地講著一個沉重的故事，
學生時代的懶散、畢業後茫然的生活、擔上家人的責任，
我們都曾經做過錯事，才會為眼眶內留下眼淚，
我們都係這樣生活過，從沒有教導下，我們都學會了！

Lily Frank 把自傳小說轉為光影後，繼續真摰、不造作！
由兩母女飾演年青和年邁的母親，情感統一、演技精湛！
(其實母親角色，幾似topmind時的舊同事，好搞笑)

Gathering

成日都係咁0架，一係就水靜河飛，一係就四面楚歌！
今晚中學同IVE啲舊同學約時間，竟然一齊夾齊會同一日搞聚會，
搞到我msn都要左右做人難，好彩最後都搞得tim，約好咗....

對唔住呀，IVE同學仔要你哋讓期！

畢業相

今日無鬼聊聊攞返畢業張相出0黎，喺網上同個舊同學傾傾吓，
先發覺相裡面有九成都唔記得佢係乜水，
尤其係女同學，只係記得一、兩個，
慶幸畢業果時本同學錄還在，所有人的名字都搵得到，
就咁樣，一個一個咁慢慢配對返0的名，
才記得起某些人、某些事....

當配到七成人時，才驚覺已經二點鐘了，
仲要俾個舊同學講：「咁嘅鐘數，係得我0地兩個先咁戇居做啲咁嘅嘢！」

車神 -- 新丁

今日上咗一位新牌仔嘅車上面，路程係由九龍塘去炮台山，
點知... ... ...就係上公主道去紅隧嘅路上，
我哋就咁行錯咗幾次，繞了三次大圈才成功上到公主道，
足足花了兩個鐘頭...這一程學繞了很多東西！

其中一樣係--有一個GPS會使你旅程愉快！
第二樣，先其唔好上個新牌仔嘅車，
尤其係有另一半嘅新牌仔，因為車裡會好鬼嘈！
第三樣，四個車轆唔係咁適合我，
都係兩個轆啱我多啲，一個人四圍去自由自在！
(只係自己冇錢買車，養車啫>.<~~~~)

理財...

星期六放工後，同一位舊同事食飯，佢剛轉職成為咗一個新丁保險經紀，
原本佢係諗著同另一位同事做個人理財嘅問卷(新丁功課)，
自己就諗著跟去觀摩吓，點知自己都幫佢做多一份...
問卷都係問你關心啲咩、退休點呀、住屋等等...

完問卷後，雖然感覺上自己講到好似好有理財觀念，
不過心知自己係懶鬼一名，而且自己更係黑人一名，投資咩死咩，
口裡說話多響亮，現實始終都係另一會事，
人工...好差...根源所在！

素食

今晚走咗去九龍灣食飯，試咗新開咗有一段時間嘅素食店 -- Buddha Hut，
全店都係無蛋、無蔥蒜、全素食，經營方式似大家樂咁嘅快餐店形式，
不過，供應牌提供嘅菜色有叉燒飯、雞排飯等等，當然全部都係素嚟ga la，
只係有0的口素心不素咁！而且店內更有提供cheese cake...

不過，估唔到係食完咗之後，雖然有啲好似冇食過嘢感覺，
但係就完全冇食完肉咁，個口有啲臭，成身有啲味嘅感覺，
就好似食完咖哩雞飯或者肉醬意粉咁，成身都係咖喱味或者肉醬味，
食飯完都唔駛食香口膠！

但係，最估唔到ge係店內播緊嘅宣傳片咁特別，
示範咗點樣為影片做十二種字幕，真係對製作者萬二分嘅佩服！
只係，短片內講到原來里安納度迪卡比奧係一個素食者喎，
而且仲有好多人出色人物都係喎...真係有0的估唔到...

《色，戒》

今朝早上終於睇咗《色，戒》，總算睇咗中秋最想睇果兩齣猛片，不過亞洲電影節果啲就...鬼叫自己太窮、人工太少...算了吧！

《色，戒》如果要用簡單言辭來描述的話，最容易嘅一定用啲舊戲名--《初哥遇著初女》，就最貼切！一個從來唔相信人嘅易先生，學人來包二奶，遇著一個初出茅廬、咩都唔識嘅女學生，大家都扮晒野，最後喺一個荒唐嘅年代，發生一件咁荒謬嘅事情！

李安完全將當時荒謬嘅世界顯現咗出來，故事大把人都好似係初哥咁，易先生初哥幫人搞偽政府，啲手下更加係初哥中嘅初哥，知道晒啲事情都唔話聲俾老細聽！鄺裕民初哥諗著去搞暗殺，點知成班人俾人哋特務組織接收咗，以為特務組織係大佬，點知成個組織俾人起咗，咩特務培訓，點知咪一樣供晒啲資料出嚟。

不過梁朝偉係戲中感覺好似老咗好多，可能係張愛玲自身嘅經歷關係，人物設定上易先生冇可口非地一定要大啲，梁朝偉亦可能因為民初片關係，專登做殘自己！

戲中嘅上海話好喜歡，可能因為上海話同中國電影人有很密切嘅關係，話晒以前中國電影工業兩大龍頭，其中一個就係上海！(另一個當然係香港啦)

又中招ar.....

今次又唔知食錯啲咩...
個醫生只係講：「可能係急性腸胃炎，不過如果繼續或者惡化，可能係其他...」
咁即係點呀...醫生...

不過腸胃炎、胃炎呢啲病好似成日都發生喺我身上...
唔通..我啲腸胃...真係咁差....
朝早起身，已經冇再發冷發熱，只係周身骨痛，
人到老年就係咁ga la...遲0的返風落雨，就好似啲阿伯咁！

中秋節~~~鬼片正！

原本一直都諗著想睇《色‧戒》，點知啲戲院爆到七彩，
得九點、十二點果兩場，唔通真係中秋節，去賞月！
而且星期三啲早場都係爆晒，除非去到荃灣咁遠睇....

中秋就去咗屋企人果屋企食飯，用NOW來搜尋其他戲院時，
估唔到原來銅鑼彎UA嘅《C+偵探》未爆喎，正！
即刻訂咗十一點場數！
(如果大家有睇報紙，就知道《C+偵探》只有UA上先)

不過真係估唔到彭發今次套《C+偵探》做得咁出色喎，
色彩、氣氛、timing、故事、剪接、音樂等等...
真係佢咁耐嘅難得佳作，值得推薦！

預早過節

圖一‧龍鬚月餅
圖二‧龍鬚糖個樣一模一樣！

預早同屋企人過節，食咗餐晚飯！
早餐、午餐連下午茶餐都冇食...一次過填飽，正呀！
而且試咗好多月餅，估唔到龍鬚糖都可以出月餅，
唔同真係咩都加「月餅」兩個字，就可以賣貴幾倍！
遲0的應該會有肉餅、面飽月餅、生果月餅都可以出現...
哎...香港人點解唔可以傳統啲，食番個正正常嘅月餅呢？

p.s. 龍鬚月只係百分百嘅龍鬚糖嚟架，唔好買呀！

《1408》好失望

去睇1408早場，
諗著用「酒店房間」做主題，咁特別應該有睇頭ga la，
點知....恐怖又唔夠恐怖，劇情又唔夠感動！
哎...反而對Trailer條《C+偵探》有興趣啲！

用恐怖片包裝劇情片，兩邊不討好
《1408》開首就講主角入住鬼屋，一開始就攞個恐怖片格局，
不過我已經心感不妙，老早知道有主角個女過身果段，
交代個女過身果段應該會幾慢節奏！點知...言中！

《1408》為咗要交代個女過身嘅橋段，
點知到中段時，一當恐怖就快到位嘅時候，
就被逼跳咗去交代個女，恐怖節奏就咁跳吓跳吓，
明知有咁多劇情要交代，一係老早就交代晒佢，
現在，恐怖片，又做不到...劇情片，又力有不遞！

訂"酒店房間"為題出色，不過捉到鹿唔識脫角！
酒店房間的鬼故事眾多，而且對觀眾較有共鳴，容易有親同感受嘅經歷，
點知《1408》卻將"酒店房間"這個咁有塑造性的原素，
變成了一個籠，變成了一個規則，變成了一個"Evil"嘅象徵！
其他原素的酒店恐怖特色，卻完全無影無蹤！
(失敗一) 酒店亡靈不斷重覆動作，出現得唔恐怖，似MTV！
(失敗二)牆裡滲血，似爆屎渠
(失敗三)廁所玩得唔夠盡，只懂得突然熱水、水滲出血，不過冇跟進
(失敗四)顯示咗好多死者ge死法，好似床上、廁所、盲咗嘅服務員，
不過除咗跳樓外，都冇跟進過
(失敗五) 因為主角唔信鬼，所以好多情節卻容易易變成搞笑片，例如聖經變白紙

繼續現實同幻想的疑問，無求新意
導演好多時候，都好喜歡用cut鏡來交代好似男主見到幻象，
例如男主角開雪櫃後，同森姆積遜理論完後，
一個反鏡就變咗好似主角只係對住雪櫃發癲！

導演就一直以這仲手法去表達似是疑非嘅劇情，
就算佢突然去返滑浪，其實佢一直都冇離開間房，
都已經估到佢仍然喺間房度，橋段已經舊到唔舊！
(《猛鬼街》用得出色過佢好多la)

尾門0黎個女孩聲音嘅錄音帶，既不懸疑、反變無聊的商業結尾片
結尾特登要主角播返個女把聲，
只係為咗表現"1408"間酒店房真係曾經發生過，
最多只交代到個妻子相信，咁又點呢？
導演以為咁樣就可以表現到詭異...可見得導演太naive了！

《戀愛大爆髮》

《戀愛大爆髮》
一齣開心活潑模仿六十年代的青春歌舞片，將當時美國的歧視問題交代得輕鬆有趣，無可否認六十年代的人確實充滿了朝氣，貓王、披頭四和胡楓等等，現在回想起來都不明白當時大家何以這麼瘋狂，音樂响起後就跳舞較勁起來，節奏把黑人同白人溶化，跳舞把窮家子同千金女拉近，音樂將一切改變！

一開場Tracy唱個首「Good morning, Baltimore」已經十分成功，一首歌已經將大部份嘅故事背景交代晒，更將Tracy的角色那胖得來可愛完成演釋出來，可見荷李活對歌舞片仍然寶刀未老、仲有一手！至於男主角，我只記得廁所用口水gel頭果一幕...真係...

仲有值得讚賞嘅係戲中做老逗的Christopher Walken，真係好難想像佢點同男人談情說愛，尊特拉華達自《油脂》(grease)後，重演歌舞片要反串做個肥媽媽，佢應該都玩得很開心！

睇完後，亦都明白點解齣戲叫"hairspray"，六十年代、廣告年代、電視年代！
全齣戲唔會有負擔，唔需要用腦諗，睇完幾放鬆！絕對適合一家大細！

作病

好辛苦，感覺有些少唔舒服，
究竟係午飯食嘅龍鳳茶樓叮飯有問題(隻蛋變壞咗)，
定係間房個冷氣直吹問題呢？
又定係今日天氣轉變呢？
啲秋風吹面真係有些涼意，但估唔到咁快又轉季！

點都好...要留意身體，病咗就大鍋！

嚟料~~~

啱啱同朋友慶祝完生日，飯咗杯咖啡，
俾佢哋講中，真係搞到瞓唔著，好鬼精神！

不過，發覺身邊越來越多朋友北上打工，
聽到好多國內趣聞，又八掛到好多公司嘅"文化"，
係唔係近幾年逗留咗喺呢間公司太耐呢？
都係時候出去走走....

今個星期很累！

今個星期都唔知咩事，只係勁感覺到「疲倦」，
每天放工回家後，都係累到要即刻瞓番一覺，
唔通真係之前太遊閒，當一有野做就適應唔到！

不過點都好，星期二都走咗去睇《無孔不入 Invasion》！
原本想睇"天堂口"同"超越時空的少女"，
點知...放工後要到九點先有場，my god！！
唯有死死地氣選《無孔不入》...

《無孔不入 Invasion》

如果Invasion只係單單以外星人侵入地球嘅角度嚟睇，就唔係幾好睇，
不過，從　正常人(Normal)同　異常人(Abnormal)的方向諗吓，
就會知道編劇想講嘅嘢，其實正唔正常跟本就唔重要，
只要「唔正常」成為多數派時，「正常」就變為異類、先係唔正常！

當「質」嘅轉變去到「量」嘅轉變，我們嘅觀念就會慢慢咁跟著轉變咗！

不過，戲裡面嘅異常人成日講，
大家成為咗佢哋後，地球將會變得幾咁和平，
點知佢哋對付啲異類時，比正常人更野蠻。
唔通真係好似嗰場飯聚時，個老人家所講咁，
人類社會就算幾發達，潛意識都保留住野蠻人的慾望、獸性，
就算外星人入侵咗人類個腦幾多％，都係保留住人類的劣根性！

《不能說的秘密》

今天看完了《不能說的秘密》後，慶幸自己有看《藍色大門》，
才發現到桂綸鎂吸引人的地方是甚麼，
就是擁有一相「情人的面孔」！

標緻可人的美女太多，就像膠美人一樣乏味無趣，
只有那種用面孔表達情感的人，更讓人心動，
面對情人時還會耍一點壞、一點陶氣，
誰不會為此神往！
想繼續看到更多桂綸鎂之後的演出~~~期待！

至於周董....就是不明白這個人，
為甚麼到現在都還可以保持著這份純真，
來回未來與過去...天真嗎？...香港導演都已經不敢拍的題材，
這可能就是為什麼大家這樣喜歡他的原因！

《藍色大門》

放工返到家中，拍打著封面佈滿塵埃的一齣VCD光碟，
就是很早以前問落舊同事阿龍借來的《藍色大門》，
因為明天預備要睇周杰倫同桂綸美的《不能說的秘密》，
所以就立即搵返桂綸美0的舊作睇，作為熱身！

看後，確實有些後悔太遲睇，
2001年，陳柏霖的樣子都已經翻天覆地不同了，
不過青春嘛~~看見成長才會驚訝人生的神奇！
就如桂綸美閉了眼睛後的世界，站在藍色大門下...

龍哥，我會盡快還返隻碟俾你ga！
你安息la！

《阿森一族大電影》

無端端個風球又打翻轉頭，下午又提早咗放工，
所以就走咗去APM睇吓《阿森一族大電影》有冇飛，
原本看見咁多人0係戲院門口，想打退堂豉唔睇，
點知又有四、五個單丁位喎，hehe.....當然唔放過啦！

其實原本對呢套卡通片ge電影版有少少保留，
話晒佢0地0的卡通咁簡單，而且保留2D畫面同畫風，
不過人0地真係夠膽色，打著Simpson老字號，
靠著玩爛Gag都可以要你荷包付出五十大銀！

內容係全球話題「保護環境」，繼續諷刺著美國政事，
中間絕核地單打0的油公司，而且更暗串睇環保演唱會0的觀眾，
大家都只當環保係一場show，到切身出現問題時才知「死」！

勸大家如果對自己英文冇信心，而且又驚唔明美式笑話，
咁中文版都算係幾好ge選擇！

窮棍！

世界上有一種人，一出生就已經好窮，
過著窮人的生活，貧窮伴隨著成長，
學識又貧乏，機會又唔會較其他人多，
出來工作的時候又欠落了一大筆屁股債，
每天只懂工作和發白日夢，
夢想有天中六合彩或者炒股賺大錢，
冇財、冇夢、勞勞碌碌大半生！

這個就係「窮棍」，香港應該有唔少這樣的窮棍...
只少有我這一個！

《五星級大鼠》粵語版有驚喜

原本諗著睇《五星級大鼠》英文版，點知只有IFC、數碼港同電影中心有....
習慣睇早場可以省番0的錢，而且唔駛假日中午同咁多人迫，
最後死死地氣去咗MegaBox睇中文版...

入到場都諗住中文版會差0的ga la，點知睇吓睇吓發現咗好多驚喜，
一來disney0的製作一向都嚴謹，中文版連title同報紙都中文化咗，
但係最大驚喜唔係男女主角個配音，反而係三個老戲骨聲音演出！

分別係：
由盧海鵬配音的"廚神古士圖"，竟然一改以前鵬哥浮誇的表演方式，配得活靈活現！

別一位係江毅配音的"食評人梵高深"，原本一直都只係配得淡淡0地，特然臨尾果場"交代"0的配音真係...真係...戲味盡顯！

最後就係劉江配的"味王Remy個父親"，雖然未見特出，不過一把好令人懷念的聲線，真係有0的老逗feel tim~~~

冇工作，反而係壓力！

公司已經去到彌留階段，大家就好似坐0係病房外，
等待著病人幾時離開，但時間總係一天一天緩緩渡過著，
空間、時間就好像凝固了，苦悶的氣氛延至整個走廊，
對病人、家屬和朋友延長時間才是真正的痛苦！

大家都唔敢踏出第一步，因為事情總有完結的一日，
就是不需要大家做出決定，發生只是時間的問題！

------------------------------------
不知怎樣，公司沒工作的日子，反而腸胃變差了，
以前都只會壓力過大時才腸胃不適，現在冇工作都咁樣...
已經數天的時間了，只要待在有冷氣地方時間過長，
肚子就會咕嚕咕嚕地痛起上來，逃出到室外的炎熱天氣，就會回復正常！
難道係我又吃了不潔的食物，還係打邊爐吃了太多肉，定係我又做錯了什麼？

------------------------------------
今天難得放工去咗沙田的文化博物館，講真都係第一次0黎，
就係只為了看"三星堆"和"金沙"的古物！
講真以博物館來講今天確實都幾多人，一個展覽館有成三、四個導賞團，
不過發覺導賞員的質素都有很大的參差，依書直說的大有人在！
後來跟住一個滿頭白髮的老導賞員，對團員的問題都對答如流，
更甚的是可以加插其他的歷史資料，更能啟發各位團友！

最後更逛了相機展，不過真係太累了，只能匆匆經過，
而且亦已經到了夠鐘關館的時候，只能望住lecia、sx70輕嘆一聲...

《索女‧喪屍‧機關槍》

星期二，減價日~~~~終於都忍唔住放工走咗去電影中心，
諗咗好耐、又成日聽到0的朋友話好好睇，
惟有電影中心有合適時間，又仍然有上映這齣電影~~~《索女‧喪屍‧機關槍》！

有人花百萬做修復，有人又會花百萬整花條片，
《索》片非一齣依靠故事來牽動觀眾的電影，而係用表達方式來摶取認同，
對媒體本身的認知和B級片的花招，再用上商業包裝，已注定《索》的成功！
色情、暴力共冶一爐，更夠膽死莫視交代故事，用斷片來偷雞又奈他不何！
連電影都來「集體回憶」一番，不過香港導演卻仍然陶醉於拍爛透的動作片嗎？

不過近幾年睇電影，尤其暑假，都特別多咗啲後生仔女，
可能覺得自己已經步入晚年0瓜，其實可以ge話都想去0的人少少ge戲院睇，
新寶、豪華0的舊戲院越睇越覺得好睇，人真係老咗！

有冇搞錯!!!

諗住去睇IMAX~~~點知所有放工時間都爆晒~~~
有冇攪錯!!!有冇攪錯!!!有冇攪錯!!!!
仲要去到7月31都冇位~~~

唔通真係要搵日平日走去睇....

哎...

冇錢...好多戲上映...冇錢....die hard..冇錢....shark 3...
...死火...又流鼻水....好多戲呀....冇錢......
...腸胃炎仲未好返呀....
...
.

應該係...腸胃炎

上星期可能食咗果塊黑炭豬扒，跟著第二日已經喉嚨痛，
返工時候只能死頂，盡量少0的活動，俾自己多0的休息，
以前期實都患過幾次，每次都係交完project就來料，
而且試過成星期都落唔到床咁濟，四枝無力咁癱0係張床度！
聽同事講，話腸胃炎係斷唔到尾架喎，所以話食清0的食會好0的！

不過到星期三，問題就開始出現，因為約咗時間洗牙！
為咗唔俾醫生發現我有病，一直忍著唔咳，
最後都只係咳咗三次，順利過關！
反而，最驚奇0既係個牙醫竟然話係我0既同屆唔同班0既中學同學，
我到臨走時都想唔起有個咁0既同學，鬼咩，每年人見太多、記得太少了！
怎麼也好，第一次洗牙都唔錯，其實冇預期般咁痛！

到星期四(即今天)，原本好轉的腸胃炎，就在一場大雨中變嚴重了，
並不是肚子的絞痛加劇，而是發燒的情況嚴重了，
赤著腳子，瑟縮在冰凍的自閉房中工作，看來離痊癒的日子又再推遲了！
還有總是不想看醫生的壞習慣應該要改掉，
如果唔係會被其他同事群體投訴的，哎....

兩年後的舊同學生日聚會

一轉間，話咁快就過咗兩年，兩年前的生日聚會，人腳依然！
不過些少都有些轉變，有人結了婚，我卻懵然不知，
可見我近幾年都太過自閉了，山中方七日，世上已千年！

不過今個月都參加過很多聚會，SB的BBQ、IVE聚會同今次夜校IVE生日聚會，
時間過得很快，工作上大家都遇上了唔同際遇，話題確實不少！
由以前功課為主的話題，已經轉變成自己公司的分享，
當然還有股票、時事或者轉工，大家其實都是活在相同的時代巨輪下，
雖然太陽底下冇新事，不過風雨底下還仍在，
其實大家都經歷緊不同，但相近的人生，怎樣說這裡都是--香港！

連搭車遇上的中學同學，話題都落在股票上...

窮...窮...

近日戶口將會再重返低位...要省食省消費~~~
要平淡過七一~~~~

繼續窮窮過日子....

六月十六日的半日活動--下半場

(圖一) MegaBox的斷頭公仔
(圖二) Samsung舊Mon公仔
(圖三) 估吓這個一百大元有找的玩具係咩？
(圖四) 就係Best電器的榨橙汁機！


七點鐘後離開燒烤場，就同打機三人組同負九龍彎新商場--MegaBox!!!
其實早就想走一趟，不過幾次都有阻礙未能成事，
今次真係啱啱遇著剛剛，就算匆忙都要逛一次先！

幸好德福個Shuttle Bus接駁都算快，排了一陣就已經可以上車，
只係覺得排隊的人太多了，一架車過了又出現另一條龍尾，好像未走過人！

大概五分鐘的時間，就己經到達MegaBox，
不過看見地下的停車位置和空間，已經知道出事...
跟本就容納不下咁多車，高層停車場入口又容易被其他車堵塞住，
還不如把地下全層掃平，增加巴士和的士停車位還覺得輕鬆些！

入內數分鐘，已經知道商場佈局同朗豪坊一樣，心已經涼了一截，
加上整個商場的笨拙佈置，確實使人不是味兒....
幸而早就知道內籠完全不同，主打傢俬裝修，仍可以吊住些分數...
Spotlight 和 Best 都算不過不失，可惜最後未能逛B&Q，
星期六，十點咁早就收舖，都唔係做生意ge！
不過，發現咗場內有三個地方有Starbucks^.^~~~Yeah！
分別係1樓、3樓的B&Q裡面和6樓！

一個依賴shuttle bus的商場...(等地舖開咗，應該行去的人流會多0地0既)
一個看不見的大電視螢幕...(都唔知俾邊個睇)
一個未完全開幕的商場...
還是等下個月另一個商業EMAX和IMAX戲院開張再去過~~~

六月十六日的半日活動--上半場

(圖一) 同事的女兒，超好動、超活潑！
(圖二) 燒烤仍然掛著打機的三人組！

星期六放工後，即刻入咗西貢的燒烤場BBQ，
難得可以約0左0的公司0的舊同事一齊聯歡一下，
點都要俾面出席一下，如果唔出席，下次都唔知會係幾時！

幸好在烈日當空下，有個帳篷頂一頂，如果唔係就....
不過始終不太習慣戶外活動，對住個火爐始都係唔係咁習慣，
燒咗冇耐，就已經退下火線了...
(其實都已經有很多年冇曬過太陽...很怕熱...)

反而可惜係隔離場的電單車場，並不是預期的那種，
看著50cc都不到的碰碰車，心裡牽起了陣陣漣漪...
我好耐冇楂過電單車呀~~~~>.<~~~~ 好想好想好想好想好想好想好想好想楂~~~~ 不過估唔到係chak記個女會係咁精力充沛， 玩足差不到三個鐘頭都未累， 不過可能係我自己老啫.... 都係為自己搵定間老人院俾自己先~~~ 西貢向海...正呀...地產傳單好似見到有間係98萬，3千幾呎... 間屋會唔會係有另一個世界0既朋友le....

開心

今天晚上遠方轉來了一個好消息，很開心，勁開心！

Thanks, God!!

有你冇我！

前晚你就一家大細，今晚又來隻會飛0既，
咁即係擺到明來開戰啫，咁即係有你冇我啦，冇得傾啦！

小強，I will be back & You will be dead！

到期

哎...今朝放工後大地震，公司只留返三份一人，感覺好差~~
雖然我可以留低，不過反而想佢炒咗我，起碼可以補番一個月糧，
而且我真係可以俾多0的心機搵工，起碼而家出去搵工都算係時機，
現在就走又唔係、繼續做又唔係！
-繼續做，就已經冇晒心情！
-辭職走人，咁又白蝕一個月俾公司！
(炒我，佢就要補多一個月遣散費俾我)

不過寄定求職信都係時候，如果唔係到最後忍受唔到公司個氣氛時，
就真係會搞到我crazy，我會失控架~~~
我寧願到一間開心0的0既公司打工，好過留底在一間冷冷清清的公司陪笑！
在SB二年的歲月，係時候重新執起包袱向前邁出新的一步，
各位SB的兄弟，我唔會忘記你0地架！一起成長的兩年，多謝您們！

記住唔好失蹤，保持聯絡！

今天感覺不是太好

生活很辛苦

曾經聽人講過，
當你知道生活辛苦時，期實你已經經歷過了。
當你感覺心裡痛苦時，因為你已經付出過了。
當你迷失在生活中時，可能你已經太習慣了！

今天感覺不是太好，總是覺得太辛苦了！

哎...旅行，你真是最好的！

哎...近來身邊有好多人去咗旅行，
有同事辭職去澳洲體驗生活，
有同事就會去歐洲旅行，
仲有我阿哥剛剛出發去咗旅行...

今朝有同事提意公司完結後，就來一次集體旅行，
開頭話去泰國，跟著話去深圳，接住又話去澳門或者長洲...
最後得出個答案就係大家都冇咩錢，跟著就話夾份抽新股，
有錢賺時就用來成立旅行基金，迫0的同事一定參加...

---------------------------------------------------
講真年尾有時間真係想去一次長0的0的0既旅行、順便探親，
聽講話金泉航空可能年尾會堆出平價美洲機票，
現在佢去溫哥華的來回機票連稅都只不過HK$5300，
到時推出舊金山機票都應該差唔多價錢，真係值得考慮！
計劃0下再一次的貧窮之旅~~~

不過0黎年尾仲有四、五個月，點都要0係俾公司炒後搵份短期工先，
如果唔係唔單只冇旅費，而且連還政府0的loan都冇錢，
咁就真係"大寧樂"呀~~~~

現在是下午四點！

傻咗！
我返完通宵更，跟著唔瞓睇咗spiderman 1同 2，
終於都可以清咗啲戲債，咁我就可以安心入戲院睇第三集...

不過現在我真係好累....今晚仲要返通宵...
好累呀...
..
.

學徒

之前因為錯過了無記的『飛黃騰達』，所以0係網上下載返落0黎睇，
點知一下載就全部下載晒，連個結尾都睇完！

James同Stefani，最後要fire邊個都很難做個決定，
兩個都合作得很出色，就猶如「內」同「外」的關係，
很難有優劣的選擇，始終二人都沒有直接交手過。
James失敗都有少少失望，話晒都係亞洲人都想有個成功0既！
不過討論區有很多人都話佢落敗，係因為美國韓裔校園槍擊案影响咗，
連James自己個blog都講到現在都想知道自己衰咩，
不過點都好，只係一個電視遊戲節目啫，唔好咁認真對待會好0的~~~


James Sun的blog:
http://zoodango.com/f2f/browse
http://www.james-sun.com

二年多的時間

在這間SB公司很快就過了二年有多的時間，
計算著差不多還有一個月就會完成所有工作，
跟著公司可能就會來一招事後大清掃，到時又要忙著同畢業生鬥搵工！
只係知道公司已經有同事遞了辭職信，新一輪逃亡潮又開始，
不過有多少同事離職還是未知之數，只係流言已經滿天飛！

正所謂『天下無不散之宴席』，怎樣說共事過已經是緣份！
聚聚散散可能還有很多個年頭需要經過，
只係走到結尾卻多了一些不安和懷念...
不過卻很希望可以學同事一樣，揹個背囊外國流浪，
只是身上已經有千斤重擔要負責了，還得乖乖做個打工仔吧！

太懶惰了--蚊子和橙

(圖一)發咗霉的橙子

今天終於"的"起心肝處理了0的垃圾，自從沒有同父母一齊住後，
生活都變得有些少頹廢，不過卻體驗了很多其他的事情！

《蚊子不停出現之事件》
近來發覺屋中來了得多蚊子，
原本一直以為是夏天來了，從山邊飛來的，
直到今天...
倒垃圾時，看見半透明的垃圾袋內有成堆蚊子飛舞，才發現真相...
現在寫這篇文章時，我仍然有作嘔的感覺...

《不可思意香氣之事件》
另一樣要清理的，是放在廚房灶君的發梅橙，
之前廚房有一陣陣酸酸甜甜的味道在空氣中飄散，
初頭以為是新換的洗潔精香味，
不過那股味卻越來越強烈，直至數天前真相終於露出來了，
就是那個從新年放到現在的橙子發出來的，
橙身已經發黑，其中一個亦佈滿白白的mo菌...

近年還有...發梅的電飯煲、成吋厚的塵、極速枯萎的文竹...

四月十八日--久違了的天氣

朝早八點放工時，站在門口撲面吹來了陣風，略帶些寒意。
但心頭卻出現了懷念的絲線，腦裡不斷找尋著線頭，
才頓然想通了，就是風中帶著的那種氣息，
因為天氣失常，今年還未出現的天氣，從鼻中刺激起腦部深邃的--記憶！

鼻子翻起了記憶中的各種片段...
這種略帶寒意、微風、陽光閃耀的日子，
就像是聖誕節聯歡會前的冬天，滲透著秋轉冬的倦意！
小學的聯歡會後的走廊，
被罰在教員休息室外(經常出現)，
寒假時還仍然懶在床上，
父母的影像...

太多記憶了，為甚麼之前總是記不起來，
是近年忙於工作，還是天氣轉變得太亂了，
可幸嗅覺的記憶實在太神奇了！

電影節後的生活

匆匆忙忙地又咁快過咗個電影節，雖然有幾齣唔記得去睇，
《吳清源》記錯時間去錯咗，不過大部份"心頭好"都睇到，
只係《吳清源》真係好想睇>.<~~~~~

相較上年，今年卻睇得輕鬆很多！
(上年似過一日睇三部、連續睇四、五天，最後搞到眼矇腳痛)
今屆電影節雖然較上年多電影，不過想睇的卻很少，
加上想睇的很多都會在香港上映正場，無形減少了選取的意欲！
而且今年的國產電影和非歐美的電影多咗，所以今年以觀望的態度居多，
不過國內的新導演真係不容忽視，加上好似新西蘭"Black Sheep"的新電影勢力，
未來的電影工業可望打破美國獨權的情況，加上好似越南、泰國、韓國，
電影院的發展可能未必容納到咁龐大的供片量，新的觀賞平台應該好快會出現，
年尾的高清電視....期待~~~~~

過咗電影節後，有一個好大的後遺症，
就係一齣正場的電影都未睇過，出咗好多動畫電影呀....
睇算！

回家已經一點！

原本網上買唔到飛的《武士之一分》，最終都買0左0的後補飛睇，
不過就攪到要連睇0左兩場tim，返到屋企有0的頭痛！

《武士之一分》可以話係繼承0左前作《隱劍鬼爪》的風格，
故事來得淡然，結束亦來得理所當然，只是細說著武士平凡的生活！
加上木村破格演出(盲人)和笑話，再加上搞鬼的下人對答，
在日本電影的冗長節奏中增添了調味料，久違了的傳統武士電影！

《跟蹤》的節奏鮮明，游乃海不愧為杜琪峰的編劇，
初執導演筒已經兼顧到電影主題，縱然風格仍然流露著杜琪峰的影子，
不過作為新導演的第一部作品，視為脫變前的過程也不為過！

任達華增磅演出效果不大，返覺累了任達華，加上冷笑話就...
不過演技、型格仍然一流！
梁家輝本身就像注定了的角色，故事中思路再怎樣清晰，
命運總是逃不過--導演的宿命論！
由新人徐子珊演繹新人，考慮周全。

窮！

窮，
可以分好多種，但對於我來講只有兩種--身窮和心窮，
身窮就係指荷包個種，咁多年來都未試過有錢過，
從來都未見過飽滿的荷包，所以近來的假一千元紙幣都與我無關！

心窮，好聽0的來講心裡無咩牽掛，
難聽0的就是無咩方向、混混噩噩過日子，心裡空得很，
看來我從來都係擁有這兩種窮的人，最窮果種！


--------------------------------------------

今晚看了《蟲師》，同預期有些少落差，
係原著故事問題、還是角色本身問題、還是導演取材問題...
嗯...都係攞返本漫畫睇一睇先~~~

噢，我病了！

昨晚睇完《喪屍羔羊》後就已經開始有少少發冷，點知到深夜...
真係病了出來，而且在夜闌人靜時在廁所分別嘔了兩次，
差點連自己的內臟都嘔了出來，
事後只係覺得肺、腸、腎都有些痛，
返到床上，心裡只諗到一首歌「我0的骨好痛」，因為我0的骨真係好痛...

原本諗著癱在床上休息一日就應該冇事，
其實這幾年我有感冒、發燒都只係匿在屋企休息。
點知衰多口同屋企的兩老講0左，
除了全屋企人都知道，而且被其他屋企人迫0左落去睇醫生，
要其他人擔心，感覺上真係唔好意思tim。

不過，看來我的身體真係唔係咁好，
曾經有過兩次腸胃炎，今次就0黎多過Gastritis--胃炎，
睇0黎真係要照顧自己多0的先得！

短訊

放工時，突然諗起K600i手機上的短訊，
希望把朋友的短訊保留下，不想轉手提電話時就這樣失去，
值得保留下來的，就應該留下！

不過SonyEricsson確實很麻煩，要用FMA才能寄存下來，
而且本身bluetooth又同個軟件唔係好夾，
要攪了一大輪先知道要同原本的BlueSoleil一齊用，
才能夠同FMA連到線，成功後已經係2點鐘了！

不過新手機...我仲未諗到買邊部ar...
都係等多陣先...

大假

原來我今年只係放0左三日大假，差0的都唔記得我係有大假tim，
如果唔係同期的同事放假，我就真係會忘記，
就咁樣匆匆地請0左二日大假(其實原本係連續四日ga)！

兩日裡，好難得竟然可以睡超過八個鐘，正！超正！

仲有時間可以睇0下電影，不過今期冇咩新戲上畫，
如果放假遲多四、五日就好，唯有睇住《幽靈車神》啦！
睇完《幽靈車神》覺得係一套超軟性電影，用來攝位都幾好！

有朋友陪的話，其實睇《愛與淚相隨》又幾okay....
不過搵邊個le....真係諗唔到！哎....唯有等出碟la！
算la，仲有好多戲會上畫~~~
怪俠多羅羅、300、尋找快樂的故事、森冤、忍者龜~~~~
正，我仲有兩日大假！

電影節的優先場

星期一走0左去太空館睇電影節的優先場，
原本無唸過會睇的《婚宴背後》，
竟然無端端因為安排上的問題睇0左，
不過之後睇的兩齣電影卻有點沉悶。

全齣戲的人物和處境刻劃都幾細緻，
並不是只懂得過分渲染角色和人物衝突的電影。
現代人對「父親」這個角色的檢閱，
身處在生父和養父的定位下，面對生活和死亡，
對後生所遺留下來的問題，終要來一個清算。

父親的犧牲，究竟可以有幾偉大？
父親的責任，可以有幾重？
是女性經常講的無聊自尊，定是身為父親僅有的尊嚴呢？

到能放來下時，一切都是淡然。

混帳的網上購票！

原本開開心心的HKIFF，就是因為這個「網上購票」系統，
我就被它玩了足足的四個鐘頭，左搞右搞、氣爆了，
上年都要搞了半天才買到，點解都做0左咁多年都唔可以穩定0的、同User Friendly0的呢！

最想睇的電影都迫於無奈錯過了，
這個系統只適合購買少量戲票，IE同FireFox都係同一命運，
買十張以下就冇咩問題，多少少都會垮！

氣爆！氣爆！氣爆！

惡女花魁、超時空泡泡女、武士之一分...好想睇呀！>.<~~~~~

念舊時

匍匐在被窩上賴床時，一個電話把晨早震醒，
原來是「兩老」那邊打來的恭喜電話，
談著...談者...
才發覺「兩老」在身邊時，過年的氣氛確實較濃郁，
晨早湛透著新年的氣色，開年飯、糖果、煙火的火硝、嘈雜聲，
只要用鼻子和耳朵都感覺到過年的生氣...

不過現在屋內只有兩團人肉物體攤在床上--我和阿哥，
現在屋內..哎....I miss「兩老」~~~~~>.<~~~~

Happy 29th

一年將過，今晚應該返完工，就係三天的春假 plus 一天dayoff~~~~
有些少懷念返學時期的悠長假期！
現在返工後，已經對「時間」這個概念完全冇晒、變晒，
只知道返工和放工，惟有對生活點綴的--漆黑的電影院，
香港電影節又來了...考慮中...冇錢...

希望來年有些變動，可以來一些大轉變，
縱然不想變，公司都會有些轉變！

快樂的年29th！

白痴 plus 黑仔的一天

今日錯晒，錯晒~~~~超級錯！
我竟然搞錯唔係調13號，係15號！
我點解咁白痴，仲要搞到趕頭趕命返工，
...今天感覺到頭頭碰著黑！

調假

終於同人調假成功，十三號放假、十四號繼續返工！
不過另一個調假就...哎...管理層真係...

新更表

混帳!混帳!混帳!!~~~~~

下張更表竟然俾我放14號dayoff，
我要14號來做甚麼，做甚麼~~~做甚麼呀！！
原本返工就好0地0地，現在就....哎~~~
想將這日"Dayoff" bid俾0的同事，點知又唔成功。
不如惱惱地就搵0的花0黎出去海旁賣，賺返筆都好喎，
一於就賣"菊花"啦！

...不過，最大可能果日我都係0係屋企自閉就算lu！

新更表...混其搞帳！

天使和惡魔的故事！

太累了嗎！？

天使輕敲打著窗外，聽不到半點聲音。
拉開窗戶，透入些少燈光，微凍？
天使低頭訴說著甚麼，靜寂著！

惡魔坐在椅子上，不明究竟？
望著天使，然後緩緩把窗子鎖上，
他們再次隔著一片玻璃窗！

天使和惡魔從來都不應該相遇！

------------------------
一個放工後，坐在椅子上特發奇想的故事

一日的行程

今天是難得的休息日(好似放監咁)，約了個KTIVE個舊同學食午飯！
(Ken哥，下次我會請客ga la！)

跟著就開始今日的行程--巡場，首先從尖沙咀行去旺角，
第一站就是新開的電腦商場--MK1，舖面站滿了大堆人群，
確實好不熱鬧，只是大家像為打XBox360多0的，所謂女模確實可有可冇，
點知上到樓...「吉舖一間間、人影冇一個」，而且三樓更加膠鏈深鎖，
哎~~~諗起APM開始的時候返而做得更好，開了舖先才真正大搞宣傳，
現在MK1俾人有點...不過觀察過後，都發覺電腦場個間隔都算滿意，
俾好多電腦商場都較寬敞，尤其走廊！

第二站就是再步行到深水埗的--高登新翼，
不過...吉舖又再一次映入眼簾，心頭又再一次冷了，
肯而新翼和舊翼相連，新翼的出租情況應該會較MK1理想，
至少比MK1就腳！

行了差不多六個鐘頭，很累了！

貧窮的日子

點解貧窮之神總是這麼綣顧著我，
戶口的零頭經常降到兩位數，
幸而還有數天就出糧...

不過一出量還了咭數後，數字又會即時降返到兩位數，
可見我的新年只會繼續躲在家中，
繼續返工、放工、匿在家中的自閉生活！

貧窮之神‧多得你！>.<
(我近排已經冇特別睇多電影呀，你0地0的人唔好成日話我呀！)

圖集

今天買了《生日快樂》的電影圖集！

《生日快樂》

今朝早APM睇了《生日快樂》。

新的博客

昨夜終於將個blog更新做新版，Blogger亦終於脫離了Beta的階段，
新版較舊版好用好多，速度快咗、唔會上載唔到，
而且個介面終於有Web2.0的感覺，不用給MSN、xanga比下去！
不枉我沒有離你而去，在出面咁多花巧的招數下，
我仍然覺得blogger會係我未來最終的狗窩！

當然我都係睇中Google收購blogger後，
對Blogger將有大規模的整合絕對有信心，
現在已經連Picasa網上相薄都開始推出，
未來的發展真係價得期待！

不過，昨夜太夜更新，所以現在都有少少累tim...
遲0的要大幅度改版先得~~~~

又再過勞勞碌碌的生活

父母又離開了香港，生活再回復忙碌(無生活目瞟)的打工生活，
每天都是返工、在canteen食飯、放工、睡覺....
只是生活上的細作又再回落在我身上，洗衫、掃地、執屋...

父母回來的一個月，確實是遊閒得多，
現在，突然間覺得工作量好似變多了，
只是懶惰的天性發作，
很想繼續休息下去.....不想管太多的東西...

工作上，希望可以不再面對「貂嬋」，
在自閉房的日子確實不太好過！
曾聽過有舊同事在自閉房攪到有「思覺失調」，
希望下個不要是我la....


今年目標：搵錢、搵錢、搵錢、搵錢....還債!!還債!!還債!!還債!!

2006的最後一天！

(圖一) 尖沙咀中心的聖誕樹
(圖二) New year with Blue Moon！

年尾雙親歸來，生活特然忙碌起來，
除夕夜只懂躲在家中的我，都要衝進人群中，
從不理解街上的歡樂，喧鬧聲不會停在腦海，
只希望為父母的面掛上少少歡欣和記憶！

十二月雖然匆忙，不過是值得記錄下來的，
把一刻一刻放在記憶庫中，
二零零六年，就是這麼的一年！

證券

證券又名「股票」！

近幾個月來，同事都討論著股票，
一大堆"恆指"、"工行"等字眼不斷在耳邊充斥著，
不過總好過討論"殺龍"、"補血"等話題好！(一個摸不著頭腦的話題)

尤其當越出來工作耐，越發覺「金錢」的重要，
千元的屋租、還有長命的政府債和不斷的生活支出，
明白到當年Joe、Edgar點解會買股票的心情，
所以開始考慮到投資等問題！(鬼叫唔夠錢駛咩)


天使這樣說：「追求金錢只會喪失本我，只會成為金錢的奴隸！」
惡魔這樣說：「跳進金錢裡，控制金錢，使金錢成為自己的奴隸！」

選擇

人成長就是要學習做「天使」和「惡魔」，
不斷從選擇中扮演著兩者，
對別人好，是天使嗎？還是惡魔？

只懂得裝天使的「好人」，
內心，總不會到天堂，
明白需要扮演「惡魔」的天使，才能在人間生存！

--很久以前已經想寫對「天使和惡魔」的想法

單人劇

孤獨的人這樣說：『日子過得好嘛？』
孤獨的人對著自己答：『嗯...應該唔差』
『這樣不是很好嗎！』
『因為從來都冇好過，所以應該冇差過。』
『冇差過？』
『一即都0係谷底，已經冇得再差了！』
孤獨的人望了望天空月亮，輕倚在夜燈下睡著了！

一個十二月--多變！